观后感logo

《厉害了，我的国》观后感




撘交关观众一样，前昶有幸观赏著纪录片《厉害了，我的国》，不禁豪情万丈，感慨万千！



影片记录著我们国家一系列亇超级工程，行我伲由衷亇觉着自家国家亇强大现状与美好前程。里乡有排工程，我伲已经有所耳闻目睹；有排工程，还稍有陌生，正急需昰恁一部影片来向我伲介绍。



作兴有人要话啧：“昰个只是宣传得好呀！”但佷看看自家身边亇各项工程，不全是真真切切亇存在？就以中国桥来讲，我活大到乃，看著（照南北顺序）杨浦大桥、南浦大桥、卢浦大桥、徐浦大桥、闵浦大桥一部部搁著黄浦江上，改变著当年高度依赖摆渡亇局面；看著苏通大桥、长江隧桥飞跨南北，行长江天堑变通途亇；看著东海大桥垂到洋山，成就上海超级大港亇；看著杭州湾大桥横亘海湾，来去覅套转亇；看著一桥连一桥，搭到舟山岛亇。当佷开著小汽车饶角落子兜亇辰光，昰両部中国桥不就是替佷提供著实实在在亇便利？！昰排不就是身边看得见，臩得着亇实惠咾？！我伲为啥不为佢喝彩嗫？！话著我伲望著回到“过条浦江摆摆渡，过条长江换换船”亇日脚？



作兴有人又要话啧：“昰种片子只是拿好亇放畀佷看呀！恘亇阿畀佷看？”嗰倒也要问问看佷啧：“侺著人家面前介绍自家好亇嗫恘亇？望著人家来介绍佷亇优点喃缺点？”何里个人不想对人家宣传自家亇好？何里个人呒得一点两点三点亇缺点？但佷阿去宣传？佷简历上阿会去列亇一长拖缺点畀用人单位看？不全塱用优点、长处再加靓照，替用人单位汏脑子亇？群体亇表现全是可以从个体身上获得答案亇。当然，闲话讲转来，尽管每个人全有缺点，但每个人全希望通过自家撘人家亇宣传，行人家认识着自家亇优点，行人家觉着自家是可用之才。同样，我伲昰支人群存在缺点，我伲昰个社会存在问题，但我伲更应该看见我伲昰支人群亇优点，看见我伲昰个社会亇进步！



作兴又有人要话啧：“昰点进步有啥稀奇亇？有啥好宣传头亇？人家老早发达得哪恁哪恁啧！”乃么佷想表达啥个意思嗫？佷嗰么是属于啥人家亇喃？阿是人家亇？侺撘我伲一样，是属于我伲昰支人群，生活著我伲昰片土地上亇呀！是亇，有亇人家是只嫌发达著嘞！生活水平是傍我伲高脱让些儿著嘞！阿眼热？眼热！人全望著过好日脚亇，阿有啥人话“我望著过苦日脚”亇？呒曼亇呀！嗰乃哪恁办？只有动脑筋、化气力，行我伲昰支人群，撘我伲生活亇昰片土地越来越好么有处呀！人家是傍我伲先走著一步，我伲是还著塱追！但是，侺出身于何里支人群，就像出身于何里个家庭一样，是不可选择亇。我伲当然只有鼓励我伲昰支人群、我伲昰个家庭不断进步、努力追赶么可能过着佷眼热亇别人家亇更高水平亇生活。不宣传、不鼓励我伲自家亇进步，话著悫张原地踏步？侺自家个人亇进步阿希望人家鼓励？



当然，人生苦短，不是人人全有耐心等到自家国家极度发达亇嗰日亇。等不及亇，若然有能力，嗰么佷去自认为生活更好亇国家谋幸福。但我伲所有其他亿万民众，要想行自家亇生活更好，还是要脚踏实地亇建设好我伲昰片土地，服务好我伲昰支人群。而现在，我伲越来越觉着我伲昰片土地亇美好，我伲昰支人群亇强大，厡像我伲祖先曾经亇辉煌伊恁。虽然历尽艰难险阻，经革著无数磨难，走过著不少弯路，但发展就是昰恁——永远是波浪式前进，螺旋式上升亇，不可能一马平川，一帆风顺亇。但是，现在出去看看，东西南北，游走全国，到块全有便捷高效亇硬件设施，到块全是安定祥和亇生活景象。我伲有啥理由不为我伲昰片土地撘我伲昰支人群自豪嗫？只要我伲人人珍惜撘守护昰种繁荣稳定亇局面，相信我伲一定有能克服当前还存在亇种种问题，朝著更加美好亇明朝，大踏步亇前进！



厉害了，我的国！

观后感 http://www.guanhougan.cc/ghg800z/19861.html
转载分享本站内容http://www.guanhougan.cc，请保留文章来源信息和原文链接！